Paralimpiya Oyunlarında da ilk qızılımız cüdodan gəldi

Ilham Zəkiyev finalda Cənubi Koreya cüdoçusu Junq Min Parkı məğlub edib

 Pekində keçirilən XIII Yay Paralimpiya Oyunlarının 3-cü günü Azərbaycan idmançıları daha 3 medal qazanıblar. Ən ağır çəkili (+100 kq) cüdoçuların yarışında mübarizə aparan İlham Zəkiyev qızıl medal qazanıb. İ.Zəkiyev finalda Cənubi Koreya cüdoçusu Junq Min Parkı məğlub edib.
 Cəkisi 90 kq olan cüdoçuların yarışında mübarizə aparan Tofiq Məmmədov finalda Fransa cüdoçusu Olivier Cuqnona, 100 kq çəki dərəcəsində Kərim Sərdarov isə kubalı Juan Karlos Kortadaya məğlub olaraq Paralimpiya Oyunlarının gümüş medalını qazanıblar.
Qeyd edək ki, bu medallardan sonra Azərbaycanın aktivindəki medalların sayı 5-ə çatıb. Daha öncə cüdoçu Ramin İbrahimov və yüngül atlet Vladimir Zayets bürünc medal qazanıb. Beləliklə aktivində 5 medal olan Azərbaycan komandası 56 ölkə arasında 25-ci mövqedə qərarlaşıb.ANS PRESS/