Avropa Kubokunda 3 -cü olan milli komandamız mükafatlandırıldı
Çimərlik futbolu üzrə Avropa kubokunda Azərbaycan, İtaliya, İspaniya, İngiltərə, İsveçrə və Norveç milli komandaları mübarizə apardılar

Bu gün AFFA-nın inzibati binasında, Bakıda keçirilən çimərlik futbolu üzrə Avropa Kubokunda 3-cü olan Azərbaycan millisinin üzvlərinin mükafatlandırılma mərasimi keçirilib. AFFA-nın I vitse-prezidenti, Milli Məclisin deputatı Rauf Əliyev tədbirdə çıxış edərək millimizin Avropa kuboku oyunlarında qazandığı nəticəni yüksək qiymətləndirib və assosiasiya rəhbərliyi adından qarşıdakı yarışlarda da komandamıza uğurlar və qələbə sevinci arzulayıb. Tədbirin sonunda R. Əliyev Azərbaycan millisinin üzvlərinə mükafatları təqdim edib.
Qeyd edək ki, çimərlik futbolu üzrə Avropa kubokunda Azərbaycan, İtaliya, İspaniya, İngiltərə, İsveçrə və Norveç milli komandaları mübarizə aparıblar. Finalda İsveçrə yığmasını məğlub edən İspaniya millisi Avropa kubokunu qazandı, Azərbaycan milli komandası isə üçüncü yer uğrunda matçda Norveç millisini məğlub edərək bürünc medallara sahib çıxdı./ANS PRESS/